Ənam Surəsi 33. Ayə - Bütün Tərcümələr
Həqiqətən, onların söylədikləri sözlərin səni çox kədərləndirdiyini bilirik. Əslində, onlar səni yalançı saymırlar, lakin o zalımlar Allahın ayələrini inkar edirlər. (Əbu Cəhl Həzrət Peyğəmbərə: “Biz sənin yalançı olduğunu demirik. Çünki sənin əmin və doğru bir insan olduğunu bilirik. Ancaq biz Allahın ayələrini inkar edirik”, – demişdi. Bu sözlər də Peyğəmbəri çox kədərləndirmişdi. Bunun nəticəsində Həzrət Peyğəmbəri (s.ə.s) təsəlli etmək məqsədilə yuxarıdakı ayə nazil olmuşdur.)
Əlixan Musayev:
Biz bilirik ki, onların dedikləri səni kədərləndirir. Əslində onlar səni yalançı hesab etmirlər. Lakin zalımlar Alla-hın ayələrini inadla inkar edirlər.
Bünyadov-Məmmədəliyev:
Bilirik ki, onların (Quran barəsində) dedikləri söz səni çox kədərləndirir. Həqiqətdə isə onlar səni yalançı hesab etmirlər (ürəklərində sənin həqiqi peyğəmbər olduğunu yaxşı bilirlər). Ancaq o zalımlar (müşriklər) Allahın ayələrini inadla inkar edirlər.
Elmir Quliyev
:
Мы знаем, что тебя печалит то, что они говорят. Они не считают лжецом тебя — беззаконники отвергают знамения Аллаха!
Ələddin Sultanov:
Həqiqətən, onların söylədikləri sözlərin səni çox kədərləndirdiyini bilirik. Əslində, onlar səni yalançı saymırlar, lakin o zalımlar Allahın ayələrini inkar edirlər. (Əbu Cəhl Həzrət Peyğəmbərə: “Biz sənin yalançı olduğunu demirik. Çünki sənin əmin və doğru bir insan olduğunu bilirik. Ancaq biz Allahın ayələrini inkar edirik”, – demişdi. Bu sözlər də Peyğəmbəri çox kədərləndirmişdi. Bunun nəticəsində Həzrət Peyğəmbəri (s.ə.s) təsəlli etmək məqsədilə yuxarıdakı ayə nazil olmuşdur.)
Kerbelayi Malik ağa:
Onların söylədiklərinin mütləq səni kədərləndirdiyini bilirdik. Lakin şübhəsiz ki, onlar səni yalanlamırlar. Lakin zalımlar Allahın ayələri ilə cihad edirlər.
Ələsgər Musayev:
Bilirik ki, səni hüznlü edir onların dedikləri. Həqiqətən, onların səni yalançı saymırlar və lakin o zalimlər yalan sayırlar ayətlərilə Allahı!
A.Mehdiyev və D.Cəfərli:
Şübhəsiz, Biz onların dediklərinin (səni sehrbaz, şair və dəli adlandırmalarının) səni kədərləndirməsini bilirik. Əlbəttə onlar səni təkzib etmirlər, lakin zalımlar Allahın ayə və nişanələrini inkar edirlər.
Kövsər Tağıyev:
Ey Muhamməd! Biz çox yaxşı bilirik ki, söylədikləri, əlbəttə, səni incidir. Onlar əslində səni yalançı saymırlar. Ancaq o zalımlar Allahın ayələrini inadla inkar edirlər.
M.Qənioğlu və T.Bilaloğlu:
Biz bilirik ki, onların dedikləri səni kədərləndirir. Onlar səni yalançı hesab etmirlər, bu zalımlar Allahın ayələrini inkar edirlər.
Sabirə Dünyamalıyeva:
Biz onların söylədiklərinin səni həqiqətən məyus etdiyini əlbəttə bilirik. Amma onlar əslində səni yalançı hesab etmirlər; şirk qoşaraq səhv; öz zərərinə olan əməli işləyən o kəslər Allahın ayələrini bilə-bilə rədd edirlər.