Hədid Surəsi 12. Ayə - Bütün Tərcümələr
O gün mömin kişi və qadınların nurlarının önlərindən və sağ tərəflərindən saçıldığını görərsən. (Onlara belə deyiləcəkdir:) “Bu gün sizin müjdəniz ağacları altından çaylar axan, içində əbədi qalacağınız cənnətlərdir!” Əsil böyük müvəffəqiyyət budur.
Əlixan Musayev:
O gün sən mömin kişilərin və mömin qadınların nurunun onların önlərindən və sağ tərəflərindən yayıldığını görəcəksən. (Onlara:) “Bu gün sizin müjdəniz (ağacları )altından çaylar axan Cənnət bağlarıdır. Siz orada əbədi qalacaqsınız!”– (deyiləcək.) Bu, böyük uğurdur.
Bünyadov-Məmmədəliyev:
O gün (qiyamət günü, ya Peyğəmbər!) mömin kişilərin və qadınların (səmimi etiqadları və dünyada etdikləri yaxşı əməllər müqabilində nail olduqları iman) nurunun onların önlərindən və sağ tərəflərindən axıb şölə saçdığını (qıl körpüsü üstündə onlara yol göstərdiyini) görəcəksən. (Mələklər onlara deyəcəklər: ) “Bu gün sizin müjdəniz (ağacları) altından çaylar axan cənnətlərdir. Siz orada əbədi qalacaqsınız!” Bu, böyük qurtuluşdur (uğurdur)!
Elmir Quliyev
:
в тот день, когда ты увидишь, как перед верующими мужчинами и верующими женщинами и справа от них будет распространяться их свет. Возрадуйтесь сегодня Райским садам, в которых текут реки. Вы пребудете в них вечно. Это и есть великое преуспеяние.
Ələddin Sultanov:
O gün mömin kişi və qadınların nurlarının önlərindən və sağ tərəflərindən saçıldığını görərsən. (Onlara belə deyiləcəkdir:) “Bu gün sizin müjdəniz ağacları altından çaylar axan, içində əbədi qalacağınız cənnətlərdir!” Əsil böyük müvəffəqiyyət budur.
Kerbelayi Malik ağa:
O gün mömin kişiləri və mömin qadınları nurları önlərində və sağlarında yayılarkən görərsən. Bu gün sizin müjdəniz orada əbədi olaraq qalacağınız, altından çaylar axan cənnətlərdir. O, fevzül əzimdir (ən böyük qurtuluşdur).
Ələsgər Musayev:
O gün görəcəksən inanan kişilərin və qadınların
qarşılarından və sağ tərəflərindən nur yağır: «Bəşarət sizə bu
gün!» Bağlar – cari olur altından onun nəhrlər, həmişəlik
qalaraq orada. Budur əzəmətli müvəffəqiyyət.
A.Mehdiyev və D.Cəfərli:
Mömin kişi və qadınların nurlarının qabaqlarında və sağ tərəflərində irəlilədiyini görəcəyin gün, (onlara) «bu gün sizə altından çaylar axan, əbədi qalacağınız Cənnət və bağlarla müjdə olsun» (deyiləcəkdir). Bu həmin böyük uğur və qurtuluşdur!
Kövsər Tağıyev:
Mömin kişilərlə mömin qadınların nurlarının önlərində və sağlarında qaçdığını görəcəyin gün onlara belə deyilər: “Bu gün sizə müjdələnən şey içlərindən çaylar axan, əbədi qalacağınız cənnətlərdir”. Bax bu, böyük uğurdur.
M.Qənioğlu və T.Bilaloğlu:
O günü sən mömin kişi və qadınların nurunun onların qarşılarında və sağ tərəflərində hərəkət etdiyini görəcəksən. (Onlara deyiləcək): "Bu gün sizin müjdəniz dibindən çaylar axan və orada əbədi qalacağınız cənnət bağlarıdır." Bax, böyük uğur budur!
Sabirə Dünyamalıyeva:
O gün, mömin kişilərin və qadınların, əllərinin arasında və sağlarından işıqları olduğu halda qaçdığını görəcəksən. -Bu gün müjdəniz altlarından çaylar axan, içində əbədi qalacağınız cənnətlərdir. Bax bu, məhz çox böyük qurtuluşdur!-